videos chti.c.la

Coquelicots d'Artois de Paul SEBILLE

COQUELICOT D'ARTOIS. 
Dins les collines d'Artois, balochint pas d'z'ous l'vint,

Les blés et les avouènes étalent leu tapis d'or;

Intre bos et patûres, je m'proumène tout douch'mint,

Ravisant d'tous mes yux, ébloui par l'décor.
 
Et j'vos par chi par là et l'rouche des coquelicots

Eclatant dins l'doré, dépassant les épis;

In veyant ch'tableau là, dins m'tiète vient tout d'in cop

Et l'souvenir des soldats qui sont quéus, ici.
 
Oubliant leu misères, pindant les mots d'été,

I cantotent à vingt ans, eune fleur à leu fusils.

Dins l'mitalle, et l'infer in l'z'avot invoyés

A la guerre, à Lorette, et sus l'Crête à d'Vimy.
 
Dins leu tiète,  y avot tout plein d'imaches,

Imaches d'eune vieille maman, d'eune fimme ou d'in infant,

Qui attindottent là-vau dins leu pétits villaches

L'artour de ch'ti qui arot l'bonheur e d'sortir du tourment.
 
Mais la Mort al tot là, et in jour sous l'ciel bleu,

Sins coprinte i veyotent un tiot morciau d'drapeau,

Comme e l'sang et les larmes qui coulottent et d'leur z'yeux,

Ch'est l'sang là, croyez me, qui est dins les coquelicots.
 
    Paul Sébille