videos chti.c.la

Su l'imache d'ech facteur, pindue après l'fichelle,
Chinq six fos dins l'année in trouvot l'évèn'mint
Qu'in fêtot sans ju-ju, ni éteinte chés candelles
Mais trouvant alintour toudis l'meimme contint'mint.

y avot bien intindu chés oeux dins chés surelles,
Quand chés cloques r'vénant d'Rome qui pondeutent dins ch'gardin.
y avot chés tartes à pronnes,ch'bouillon d'co dins ch'l'écuelle
Quand ch'bidet d'bos v'not cor' bercher tous nou gamins.

y avot l'pile ed'ratons tersautant d'chés païelles
Quand in s'épouvintot dins ches viux z'habill'mints.
y avot ch'l'àpe à savon, l'pièche d'argint dins l'cuvelle
Quand in rindot ses lifes pour ramasser crottins.

y avot l'pichon dins l'dos, al dalu, ches imbroulles
Quand grand-père i cachot es'n équelle ed carr'ieux.
y avot nou bonne Sainte Barpe noïée dins ches bistoulles,
Adon quand ech carbon rindot ches gins heureux.

Et pi j'ai chi gardé in' toute dernière écosse
in' bricole in ferralle qu'ln eufe incor rar'mint.
Ech' bon viux gaufrier tout comme el juet d'in gosse
Qui dort là au guernier, ahoqué dins in coin.

El gazette qui l'inv'loppe, ch'est dév'nu comme d'el chire.
Comme ech' portrait d'grand-père au temps d'sin régimint.
Tous ches toiles des éronnes pu douche que du cach'mire
Ch'est là comme d'el dintelle su les ropes des vielles gins.

Ech' gaufrier ed dins l'temps, ch'est là comme in' imache,
L'arlique d'in' sainte é feimme, rimplie d'sin dévot'mint
Ch'est in life qu'in a querre dû qu'in trifoulle ches paches,
Qu'in n'peut pu s'in défaire quand in a sin nez ed dins.

Ch't'in morcieau d'carreau d'vite qui r'flète su nou visache
Au momint où l'progrès i' a inl'vé l'sintimint
Des plaisis qu'ln a eus quand pour les étrennaches
in' gaufe sèque al vénot récauffer l'creux d'nou main.

Ch'tot souvint in décempe, quand l'frod léquot z'orelles,
Quand l'neiche al armuchot les tros quarts ed' ches camps
Qu'min gaufrier contint i déchindot l'équelle
Pour li vénir roussir les gâtiaux des infants.

Ech tapis d'toile chirée i avot cangé d'fleurettes.
Ches fnêtes i' aveutent archu des nouviaux z'habill'mints.
Ech' long ramon in bos i comptot ses buquettes,
L'boîte in fer su ch'buffet al milot z'évèn'mints.

Quand in véyot grand-père rassaquer s'tiote mand'Iette
Qu'i' avot tréchée l'hiver aveuc du bos d'noj'tier,
Pour Ii cacher à oeus là dins tout chelle païette
Dû qu'sin co batillard vénot l'écaniller.

Ou qu'in véyot grand-mère tijonner à l'gueulette
Pour faire rougir ches groches d'in fu qu s'indormot
ln sintot dins l'mason monter in air ed' fête.
Ch'canarien dins l'gaïolle i sifflot su ses dogts.

Dins l'saladier in terre, findu comme in' voïette
Qué l'pleufe n'a pas v'nu vir edpu in bon momint,
Ech' burre, ech' lait, el frainne, meimme ech' chuque in pourette
I se faijeutent des baisses pa-d'zous ch'viux échue-main.

Parel à in groët qui vient ouvrer dins l'terre
Préparer tous ches parcs pour ins'mincher ch'gardin
Ches mains toutes répilleusses pi crochuttes à grand-mère
Faijeutent fonte ches maclottes au mitan d'ech' pétrin.

Pour faire ches boules grand-père i n'avot pas sin maîte
Printe es' plache pou ch'ju là i érot grinché des dints.
I s'arveyot tout jonne in train d'juer à l'tiquette
Aveuc ches biscaïens v'nant d'el fosse ed sin coin.

Oins l'finquère toute chucrée, d'bout dins ses charentaisses
Grand-mère restot plantée, ches deux manches dins ses mains
A raviser sin burre et ches mapes s'faire des baisses,
Ou acouter sin fu ronfler tout douchet'mint.

Des gaufes in n'in fait pu, ch'est gramin trop d'ouvrache
Pour flamiquer achteur in a pu l'temps d'à rien
Pourtant in'in minge cor' quand su l'plache du villache
in' baraque à l'ducasse al in cuit pour ches gins.

Friandisse des vielles gins qu'in r'trouvot à l'candelle
Dins ches bouques édintées, pa-d'zous l'mouchoir d'in tiot
Quand in savot incor pour ech' l'année nouvelle
V'nir imbrasser in viux pour in méchant gâtiau.
Isaïe LAMPIN