videos chti.c.la

LES MARIE DU TEMPS JADIS

Quand j’allos passer l’après-midi amont d’ mes grand tantes avec mémère qu’in y allot in autobus, j’ les acoutos raconter leu zhistoires  et chétot eune vraie partie d’plaijis ; alles s’ racontotent leus souvenirs d’ jeunesse in dijant du mau d’ chés gins dé ch’ temps là. Et surtout d’ chés femmes, là chétot  toudis l’unanimité. Et mi j’rigolos comme un pindu in les acoutant…

Comme tous chés filles dé ch’ temps là, alles s’appélotent « Marie », avec souvint un aute prénom à coté, Marie Thérèse, Marie Louise, Marie Josèphe, Marie Antoinette, Marie Rose, Marie Jeanne… Mais  alles zavotent inventé des tiots noms , et cha donnot Marie ch’ pot, Marie Toutoulle, Marie gougoutte, …

Déjà rien qué ch’ nom, à l’intinde, sans minme savoir d’ qui qu’i s’agichot,  cha faijot rire. Marie-Toutoulle, par exempe, cha voulot dire eune qui parlot toudis pour rin dire, qui pouvot raconter des zhistoires toudis parelles à n’in pus finir, comme un pou borne, qui rasot tout l’ monde . Comme quéqu’un qui toulle et artoulle s’ cuiller dins s’ jatte à café ; cha sert à rien. Et comme alle parle toudis, alle a pas l’ temps d’ faire sin ménache, alors eune Marie toutoulle, chétot souvint aussi quéqu’un qui savot pas ténir s’ baraque …

Marie ch’ pot, chétot eune qui vivot dins eune since et qui s’ trainot toudis avec un pot dins ses mains ; pétète pour traire chés vaques dins chés zétabes ou dins chés camps ; ou pétète pour picher.  Avec min frère in étot plutôt pou l’ deuxiinme version qui nous faijot rire aux larmes ; in l’imaginot déambuler tout l’ journée dins s’ baraque avec sin pot d’ chambe à s’ main … Mais in avot p’tête l’esprit mal tourné .. Marie ch’ pot, cha pouvot ête aussi Marie ch’ pot au lait, ou ch’ pot au feu, ch’ pot aux roses, ou cor ch’ pot pourri …

Marie Gougoutte, cha devot ête sûremint eune nourrice, qui donnot du lait à chés tiots quinquins qu’ leu mère alle é  n’avot pas ; rien qué ch’ mot gougoutte, in pinsot à eune femme assis dins un coin in train d’ allaiter un tiot, et à peine fini, qu’ cha gouttot cor, qu’alle arboutonnot sin corsache in vitesse pou courir aller in faire têter  un aute … Ou alors cha pouvot ête eune qui crachot pas sur un verre d’ goutte après sin café … Délle goutte, chétot du rhum ou du g’ niève qu’in mettot dins du café d’ arpassache qui n’avot pus gramint d’ goût …Ou bien qu’i étot toudis inrhumée avec sin nez qui coulot …

Variante : Marie-bistoulle ou Marie cul-sec : qui dijot jamais nan à un pétit armontant après ch’ café, et minme deux

Marie nonoche, chétot eune Marie qui tournot pas rond dins s’ tiête ; nonoche cha veut dire attardée, bébête, babache, pas fort à plache.

Marie pète sec … Là cha claquot comme un coup d’ cheinture ; in pouvot imaginer eune vielle fille, tout raide, tout décarnée, avec un capiau et eune voilette, fier cul, sans gramint d’ compassion pou chés malheurs dé z’ autes ; sans jamais d’ larmes dins ses ziux, tout secs …

Marie bonasse : eune bonne fille , avenante, toudis prête à rinde service à tout l’ monde, avec sin cœur su’ s’ main ; qu’in peut i faire tout vire, qu’alle dira jamais rien … trop bonne trop bête.

Marie couche te là : eune Marie sans gramint d’ morale ni d’éducation, eune fille perdue, eune trainée qu’ alle dijot m’mère, eune qui avot aussi vite fait d’artirer sin corsache pis l’ reste que d’ passer un gant su s’ figure,  et qui pouvot faire cha n’importe dù ..

Marie salope : variante éd’ Marie couche-te-là mais in pire, qui fait tout vire à s’ n’ homme

Marie souillon, eune qui étot jamais fort prope, qui s’ lavot pas, avec des taques su s’robe, ses cavus tout sales, qu’in l’imaginot putôt dins eune porcherie in train d’ donner à minger à chés cochons

Marie gogosse : qui n’avot pas grandi, qui étot restée in éfanche

Marie grande fartoulle : des grandes fartoulles, chérot des robes ou des jupes trop grandes et trop longues, ou des mantiaux qui trainotent par terre ; des femmes qui zavotent pas quère s’ sintir à l’ étroit dins leus nippes ou qui véyotent trop grand ou trop lon … Chés grandes fartoulles, chétot arvénu à la mode après 68 avec chés hippies qui mettotent des robes éd’ bohémiennes d’ tous les couleurs qui trainotent par terre ; mémère alle dijot aussi des ramasse poussières …

Marie galoches : chelle lalle, alle allot avec des galoches à ses pieds, des chabots in bos . Ou alors qui avot sin minton in galoche, comme chés vielles sorcières. Y avot des mal élevés qui dijotent aussi « rouler eune galoche » à eune fille, pour dire imbrasser avec s’ bouque et s’ langue … Mais Marie mes galoches cha voulot pas dire cha, j’ cros pas ; nan, chétot eune qui allot avec des grosses godasses in trainant ses galoches..

Marie taloche : des taloches, chétot des claques, des marrons, des borniffes ; Marie taloche, chétot eune qu’avec elle  chés coups y quéyotent tout seux, pour un ouais pour un nan, qui valot miux pas rigoler avec …

Marie piche toudis (ou Marie pipi) : là ché pas la peine d’intrer dins les détals

I n’avot sûremint cor des autes qu’ jé m’ rappelle pus aujourd’hui. Y’ avot pas des noms comme cha pou chés zhommes ; ché normal, chétot des saints … Et des noms pour eux, i n’avot des flopées : des noms d’apôtes : Pierre, Paul, Jacques,  …  Des Joseph, Gaspard, Noël, … Y avot aussi des René, Louis, Jules, Oscar,  des Honoré, …  mais là aussi chétot sûremint des noms d’ martyrs ou d’ malheureux canonisés …

« marie souillon »-« marie gogosse »- «  marie-bistoulle »-« marie salope »- «  marie mes galoches »-« marie pipi »-«  marie piche toudis »

Pou chés zhommes, qui s’appélotent souvint Louis ou bien Joseph, j m’ rappelle pas qu’y avot des pétits noms comme cha ; j’ pinse pas . Chés zlhommes i zétotent parfaits , sans défauts, travailleurs, fidèles,

Prénom de la mère du Christ et reine du Ciel, Marie vient de l'hébreu

 Myriam, signifiant « qui élève ».

Bernard DOURLENS