videos chti.c.la

MIN PATOIS

Min patois, ch'est eune lang'que j'sus fier ed'parler,
Car d'puis que j'lai appris avec min père et m'mère,
Y s'est passé d'z'années, jè n'peux point l'oublier,
Incore que j'déviendros fort vieux, et même cent'naire.

D'ailleurs c'mint voulez vous qu'in arnonche au bonheur
D'avoir eune linque à nous qu'in appelle el rouchi,
D'puis si longtimps qu'in l'pale dins min pays d'mineurs,
J'peux point dire autremint qu'in biau patois d'ichi.

L'origine du patois, as'perd dins l'nuit des timps,
Tout comme bin des langaches qui vientent ed'tout partout,
Et ch'ti qui crot l'savoir, ch'est p'tête un tiot malin,
Mi j'n'irais point s'qu'à là, in pins'rot qué j'sus fou.

Pou parler inter nous, quo d'plus biau qué l'patois?
In dit si facil'mint, in l'pale comme in respire,
Tint pis pou l'zétringers si y n'comprinttent pas,
I n'ont qu'à faire comme nous ou alors en'point v'nir.

Quind j'étot tiot, tout tiot, et qu'j'avos du chagrin,
Em'mère a m'consolot in m'berchint dins ses bras,
A m'cantot, eune berceuse, ch'étot "min tiot quinquin"
Et là j'marrêtos d'braire, pou m'calmer y avot qu'cha.

Quind j'ai grindi un peu et qu'j'ai té à l'école,
Y a bin fallut apprinte el Français comme tout l'monte,
Mais dès qu'étos sorti, fini tout les paroles,
J'arparlos min patois sins jamais n'd'avoir honte.

J'n'avos pau core quinze ans, j'étos déjà al fosse,
Et là queule contint'mint, y avot foque un lingache,
Du pu tiot s'qu'au pus grind, in avot tous quète'cose,
Qui nous rindot égal, ch'tot l'patois d'not villache.

Insuite, au régimint et pus tard dins la vie,
Avec mes comarates, in tot vite arpérés,
Quind in nous intindot, in dijot, v'là l'chtimi,
Et nous in tot fin fiers, j'sus point prêt s'l'oublier.

A ch't'heure qué mé v'là vieux, quind ej'vos la jeunesse,
Qu'al fait fait beaucop d'étutes, j'souhaite qu'al n'oublie point,
Qu'no patois ch'est eune part d'héritache qu'in leu laisse,
Surtout, n'l'arniez point, pou qui nous reste tout l'timps..
Paul Sébille